當一個小工具開始變成一個異象

其實 HKFMC 對我嚟講，唔係一個好高深嘅科技計劃，而係一個開始。

呢幾年 AI 發展得好快，好多以前要自己慢慢寫、慢慢試嘅功能，依家 AI 已經可以幫我做一大部分。當然，自己都要明白個系統做緊乜、知道問題喺邊，同埋識得同 AI 一齊 troubleshoot。

但我最關心嘅，其實唔係技術有幾勁。

我最想做嘅係：點樣利用而家嘅科技，令教會一啲原本好麻煩、好花時間嘅工作，可以變得簡單啲。

例如我以前參與聖經問答比賽，搞一場比賽其實真係好多嘢做。

要預備題目、搵經文、打答案、整 PowerPoint，如果要玩搶答，仲可能要準備搶答器、駁線、試機。可能最後只係玩半個鐘或者一個鐘，但之前已經預備咗好耐。

到後來 Internet 方便咗，已經有啲平台可以俾人掃 QR Code，用手機當搶答器，的確方便好多。

但問題係，老師仍然要自己逐條問題輸入、逐個答案設定。

所以我就開始諗：

既然 HKFMC 已經有自己嘅 Bible Library，點解唔將聖經題目、比賽系統、手機搶答同投影畫面全部整合埋一齊？

我希望將來一間教會要搞聖經問答，唔需要再由零開始準備。

主持人只需要設定好比賽，系統就可以產生 QR Code，參加者用手機登入。

主持人部電腦負責控制比賽；

參加者嘅手機負責搶答；

Projector 就顯示題目、答案、分數同比賽進度。

如果所有嘢都可以連埋一齊，老師就可以少做一大堆技術同預備工作。

當系統慢慢運作得穩定之後，我下一步想做嘅，就係諗：

點樣令成個聖經問答比賽更加有氣氛。

唔係淨係「出題、答題、計分」，而係手機、主持人電腦同 projector 可以互相配合。

有人搶答時，全場即時有反應；

答對或者答錯，畫面可以有變化；

分數更新、回合轉換，都可以令參加者更加投入。

我想做嘅，其實唔係一個普通答問題嘅網站，而係一個真正可以用喺教會現場嘅工具。

當然，去到真正多人同時登入、手機即時同步、database 同 server 一齊運作，就會有另一個現實問題：

成本。

簡單嘅網頁同個人使用工具，我可以盡量免費公開俾大家用。

而家 HKFMC 網站上大家見到嘅好多工具，我都希望可以繼續免費分享，唔需要大家另外付費。

但如果係完整嘅教會多人比賽系統，每多一班人同時使用，database、server 同即時連線都會有實際成本。

講得簡單啲，就係用得越多人，張 Visa 卡就越快開始扣錢。😂

所以現階段，我會先將一啲簡單、適合個人或者一般教學使用嘅工具公開分享。

至於完整嘅多人即時聖經問答系統，就先留作自己教會實際使用同測試，一步一步改善。

我對 HKFMC 嘅想法其實好簡單：

可以免費分享嘅，我希望盡量分享；需要實際成本先可以運作嘅，就先量力而為。

我唔係想用科技取代老師、導師或者教會服事。

反而我希望科技可以幫佢哋做少啲重複、繁瑣嘅工作。

因為如果系統可以幫老師慳返一兩個鐘準備時間，佢哋就可以將嗰一兩個鐘，用返喺小朋友、弟兄姊妹同真正嘅服事上。

呢個先係我最想做嘅事。

HKFMC 對我嚟講，只係一塊踏腳石。

我都仲一路學、一路試、一路改。

但我希望有一日，科技唔再只係令人覺得「好勁」，而係真真正正可以令人覺得：

原來服事可以簡單一點，而學習聖經亦可以有趣一點。