《同理心，不是穿上別人的鞋》

最近，我愈來愈期待正式開始喺教會服侍。

呢幾個星期，無論祈禱會、主日崇拜，我都刻意多聽弟兄姊妹講嘢，多認識佢哋。老實講，我未必記得晒每一個人嘅名字，但一張張面孔、一個個人，已經慢慢放咗入心裏面。

因為我愈來愈覺得，牧養有一個好重要嘅前提——關係。

如果彼此根本冇關係，一個人未必願意聽你講，更加未必願意將生命入面比較深、比較痛嘅事情告訴你。

信任唔係因為你個名牌寫住「傳道人」就會自動出現。

信任，係從關係慢慢建立出嚟。

最近男子小組講到一個題目：同理心。

以前上堂，老師好鍾意用一個比喻：

「同理心，就係穿上別人的鞋。」

呢個比喻聽落好合理。

但我一路諗，愈覺得事情可能冇咁簡單。

如果對方嗰對鞋根本唔啱我著呢？

太大、太細、夾腳、磨腳，甚至個款我完全唔鍾意。

就算大家著住同一對鞋，兩隻腳都可以有完全唔同嘅感受。

我自己就試過買過一對幾靚嘅黑色運動鞋。

望落去真係幾靚，著上腳一開始亦冇乜問題。

點知有一日崇拜完，我由教會一路行返屋企，愈行愈唔對路。

隻腳開始痛，跟住連小腿都開始抽筋。

嗰一刻我先真正明白：

幾靚都冇用。

唔啱著，就係唔啱著。

所以我開始覺得，同理心未必係「穿上對方嗰對鞋」。

可能更加接近：

坐低，聽對方講——

「你穿住呢對鞋，到底係乜感受？」

因為即使兩個人面對同一種疾病、同一種失落、同一種家庭背景，佢哋經歷嘅痛都可以完全唔同。

每個人對痛楚嘅敏感程度唔同。

每個人嘅感受唔同。

每個人對一件事情嘅理解亦唔同。

所以一句「我都試過」，唔代表下一句就可以係：

「所以我完全明白你。」

我以前聽過一位牧者講，要真正明白做父母，就最好自己先有小朋友。

後來佢真係有咗小朋友，亦的確好成功咁服侍教會嘅兒童。

我明白佢想講乜。

個人經驗的確可以幫助我哋理解別人。

但問題係：

經歷係幫助，唔應該成為同理心嘅入場券。

如果一定要經歷過先能夠同理，咁我係咪一定要患過癌症，先可以陪伴一個癌症病人？

一定要失去過至親，先可以明白失去至親嘅人？

一定要經歷過每一種痛苦，先有資格坐喺一個受苦嘅人旁邊？

一個人根本冇可能經歷世上所有痛苦。

所以同理心唔係：

「因為我都試過，所以我明。」

而係：

「即使我唔完全知道你有幾痛、有幾辛苦，我仍然願意留低，聽你分享，聽你哭訴。」

而呢樣嘢，其實要學。

要學幾時講嘢。

亦要學幾時收口。

要學唔好打斷對方。

要學唔好急住畀答案。

更加要學唔好對方講緊自己嘅事，我哋轉個頭就將個說話空間搶咗返嚟講自己。

教會裏面仲有一句說話，我哋好容易講：

「我為你祈禱。」

祈禱有冇問題？

當然冇。

將事情交畀神，有冇問題？

更加冇。

問題好多時係——次序。

如果一個人仲未講完，我已經一句：

「我為你祈禱。」

有時對方收到嘅訊息未必係：

「有人願意陪伴我。」

反而可能係：

「知道啦，唔使再講喇。」

「我為你祈禱」有時甚至會不知不覺變成一個打完場嘅方法。

祈禱係牧養嘅一部分。

但祈禱本身唔等於同理。

如果我連對方究竟經歷緊乜、痛緊乜、擔心緊乜都未聽清楚，我哋又係咪真係願意喺信仰裏面陪佢呢？

耶穌其實係一個極有同理心的人。

拉撒路死咗。

耶穌知道之後會發生乜事。

祂知道拉撒路會復活。

照道理，祂大可以同馬利亞講：

「唔使喊，等陣就冇事。」

但耶穌冇咁做。

當祂見到馬利亞同其他人哭，聖經只係簡單記載：

「耶穌哭了。」

祂知道答案。

祂知道結局。

但祂冇因為知道答案，就跳過眼前一個人嘅痛。

《羅馬書》12:15：

「與喜樂的人要同樂；與哀哭的人要同哭。」

有時牧養唔需要千言萬語。

一個人願意坐低，真正聽另一個人講佢嘅痛，可能已經比千言萬語更有力量。

我唔係你。

我未必完全明白你。

但我願意認識你。

我願意聽你。

我願意陪伴你。

而我諗，牧養好多時，就係由呢度開始。